Gi ini na episót, umófaisen si Jay nu guahu 🤓 inigui' palu i sinangån-ña:

"Suette yu' na umabok ham yan si Dabit, yan ná'magof lokkue' na gaige yu' na hu li'e' palu gi hinanao-ña umeyak fumino' Chamoru desde umásodda' ham gi dos mit bente. Magåhet na gófmagof yu' siña en hingok dídide' put si Dabit yan i lina'lå'-ña yan i che'cho'-ña gi fino' Chamoru. Pues anyways, enao ha' nu i tinituhon. Puedi en fehmåni i inadingan-måmi yan si Dabit".

Saina ma'åse' ta'lo Jay na un cho'guiyi hit nu ini. Hu agradesi hao, che'lu!

Gi ini na episót hu ofaisini i abok-ku si Erin Nikole Gums. Ai adai, mamåhlao yu’ nu taimanu umásodda’ ham. Yan umádingan ham dídide’ nu eyu gi halom i episót, pues nangga nåya ya para en hingok. Lao magåhet nai na magof na umásodda’ ham. Yan ya-hu prumaktika fumino’ Chamoru yan si Erin sa’ guaha na biåhi ga’o-ña munå’i yu’ notan bos, yan ti hu ossitátani hamyu: gófmaolek na práktika eyu! An ti en chéche’gue nåya, chagi fan. Pues anyways, enao ha' nu i tinituhon. Puede en fehmåni i inadingan-måmi yan si Erin.

Gi ini na episót hu ofaisini i abok-ku si Clarissa Mendiola. Lao para en hingok yu’ fuma’na’an gui’ si Mames sa’ eyu i na’ån-ña Chamoru. Yan gi magåhet, ti sesso umádingan ham nu i achok håfa. Sessoña umádingan ham an in nisisita kulan “extra pair of eyes” nai nu i kadakuat fina’tinas-måmi. Títuge’ gui’ ya guaha na biåhi, ha faisen yu’, “Dabit, kao siñun taitai fan?” Yan kákanta yu’ ya guaha na biåhi, hu faisen gui’ “Mames, kao siña un ékungok fan”? Yan eyugui' i inabok-måmi. Pues anyways, enao ha’ nu i tinituhon. Puedi en fehmåni i inadingan-måmi yan si Mames.